Kwayedza
Muchaneta Chimuka
Murume wekuChitungwiza akatsemurwa shaya nebhodhoro apo akanga achipomerwa mhosva yekubata magadziko emumwe mukadzi apo vaitamba mimhanzi mubhawa reko. Tonderai Mushangi (31) wepanhamba 2518, kuSt Mary’s ndiye akasangana netsekwende iyi apo akatsemurwa shaya nebhodhoro naConstance Hukuimwe (29) wepanhamba 2743, kuSt Mary’s kwakare.
Mutongi wedare reChitungwiza Magistrates’ Courts, Yeukai Chigodora, akapa Hukuimwe chirango chekubvisa faindi ye$300 ndokuti kukundikana kwake anozogara mujeri kwemazuva 90. Muchuchisi Tendai Katonha akaudza dare kuti nomusi wa25 Zvita gore rapera munguva dzemanheru, vaviri ava vaiva muPressure Yatanga Night Club apo Mushangi akanga ainwa doro achitamba mimhanzi.
Hukuimwe, uyo akange ari nechekumberi kwaMushangi, akangoerekana acheuka achibva atanga kumupomera mhosva yekuti ainge amubata magadziko asi Mushangi akarambisisa mhosva iyi. Panguva yekunetsana iyi, Hukuimwe akabva asaidzira murume uyu achibva apunzikira pasi ndokubatsirana nevamwe vasati vabatwa kumurova nezvibhakera nebhutsu.
Mushangi akabatsirwa neshamwari dzake kuendeswa kuchipatara asi Hukuimwe akatevera ndokubva amutema nebhodhoro redoro pashaya. Matsamba ekwachiremba anoratidza kuti Hukuimwe akaita ronda rakadzika kwazvo pashaya yake yekurudyi akaburitswa mudare seumboo.
Pabotso iri, Hukuimwe anoti akarasikirwa nenharembozha yake yerudzi rweGtel inokosha $35.
