Kwayedza
VANA vechikoro, hounoi mukana wekupota muchitumira mibvunzo yenyu kuKwayedza tibatsirane kuti Shona ireruke. Tumirai mibvunzo yenyu kuMupepeti nenhare dzinoti +263 714 200 007 kana e-mail inoti: [email protected] kana [email protected]. Taura zita rako rizere, chikoro chako, giredhi, nenzvimbo inowanikwa chikoro chako.
* * MHINDURO DZESVONDO RAPERA:
Tipe mazita evana vemhuka dzinotevera:
1. Mwana weshumba anonzi . . . (handa/mbwanana)
2. Mwana wekatsi anonzi . . . (chidharimbo)
3. Mwana wegudo anonzi . . . (rushiye)
4. Mwana wemhemwe anonzi . . . (tsvana)
5. Mwana wenguruve anonzi . . . (chigwi/humbanana)
* * *
ZVAKABVA KUVANA:
Cecilia Chigodora ari muGrade 7 paMuparutsa Primary School, kuHonde Valley anoda kuziva kuti: Chii chakatanga kuvapo zai nehuku?
* * *
Faith Vushe ari muForm 1 paHighfield 2 High School, muHarare ndokuti:
1. Mbumu – Pandakadonha guruva rakati mbumu mudenga.
2. Bheu – Ndakati gonhi bheu ndichibva ndapinda mumba.
3. Tsve – Ndakati ndiro tsve ndichimhanyira kunotamba.
4. Tasa – Pandakamurova akabva ati tasa ndakabva ndafunga kuti afa.
5. Togo – Ndakaona hutsi kuti togo mudenga apo yakange iri imba yedu yakange yatsva.
* * *
Owen Maguwa wepaMuparutsa Primary, kuHonde Valley anobvunza kuti: Vana vanozvarwa vari 4 panguva imwe chete vanonzi chii neChiShona pamwe neChiRungu?
* * *
Sir Garise wekwaMutoko anoti:
Tsumo nemadimikira:
1. Muzere masvosve
2. Kumhunga
3. Mashe
4. Dope
5. Ivhu.
* * *
Mhinduro yetsumo:
1. Chakata
2. Mhunga
3. Marishe
4. Dope
5. Ivhu. – 0716 542 621.
* * *
Tanatswa kuHonde Valley anobvunza kuti: Munhu asina mwana anonzi chii?
* * *
Mazita evana vemhuka:
1. Shumba – handa
2. Katsi – mangoyi
3. Gudo – rushiye
4. Mhembwe – kashere
5. Nguruve – handa. – 0713 286 627.
* * *
Pakasumuka motokari, guruva rikasara richiti togo mudenga. – 0734 822 520.
* * *
Tsumo inoti “Kuneta ndekwemukuyi sadza rinodyiwa . . .” inopedziswa sei? – 0778 947 679.
* * *
Varairidzi nemiwo vaverengi, batsirai vana pamibvunzo yavabvunza iyi.
* * *
ZVEKUITA SVONDO RINO:
MuZimbabwe tinorima zvirimwa zvakasiyana-siyana zvinosanganisira fodya, chibage, donje, manhanga, nzimbe, madomasi nezvimwe.
Kune zvirimwa zvinoberekera vana muvhu. Nyora zvirimwa zvisere zvinoberekera pasi pevhu.
* * *
Mhinduro svondo rinouya.