Kwayedza
APUNYAIRA haashayi misodzi! Chirevo ichi chinozadziswa nekusanduka kweupenyu hwemumwe mukomana aizivikanwa nekuita mabasa ekufudza mombe uyo akaita rombo rakanaka rekuwaniswa bhezari nekambani yeDelta Beverages pasi pechirongwa chayo cheDelta Education Assistance Programme (DEAP), izvo zvakaita kuti akwanise kuenderera mberi nedzidzo.
Takunda Guyo wekwaChidembo, kuShamva, nevamwe vakomana nevasikana vechidiki makumi maviri vakaita zvidzidzo zvavo zveA- Level vachibatsirwa nekambani iyi iyo yaivabvisira mari dzechikoro.
Guyo akanyorera kukambani iyi achikumbira kupinzwa muchirongwa ichi mushure mekubuda ne6As ne2Bs pabvunzo dzeO-Level achibva awaniswa bhezari neDelta Beverages kuti anoita A-Level paChipindura High, kuBindura.
Semunhu aive neshungu nedzidzo, Guyo akabune mapoinzi 15 uye nhasi uno ave chidadiso apo akabatana nevamwe vadzidzi 3 000 avo vakawaniswa madhigiri ekupedza zvidzidzo paUniversity of Zimbabwe svondo rapera.
Guyo ndemumwe pakati pevadzidzi 80 avo vari kubatsirwa pasi pechirongwa ichi.
“Ndinotenda kambani yeDelta nechirongwa ichi uye pane rimwe remazuva ndinovimba kuti ndichanyora bhuku renhoroondo yekusandurwa kwakaitwa upenyu hwangu nekambani iyi kuburikidza nemabhezari avo,” anodaro Guyo, uyo ave kushandira rimwe bhanga muHarare.
Chirongwa cheDEAP chine 11 miviri inoti Delta Student Bursaries Programme (DSBP) neDelta Schools Assistance Programme (DSAP).
Chirongwa cheDSBP chakaparurwa kumakore ekuma1990 nechinangwa chekuwanisa dzidzo kuvana vanobva kumhuri dzinotambura kuti vakwanise kuita dzidzo yesekondari uye pane tarisiro yekuti chibatsire vana vanodarika makumi masere, kusanganisira vekuyunivhesiti, chiine homwe yemari inosvika US$120 000 pagore.
Kune vamwe zvakare vadzidzi makumi maviri vakasarudzwa kuti vabatsirwe neDSBP kuita zvidzidzo zveA-Level apo vashanu vavo vari kuenda kuyunivhesiti.
Chirongwa ichi chine donzvo rekuwanisa mikana yakaenzana pakati pevakomana nevasikana munyaya dzefundo.
Mugore ra2013, vasikana vatatu vakawana madhigiri mushure mekupedza zvidzidzo zveMedicine, Psychology neHonours in Arts paUZ uye muna 2014 vatatu vakawaniswa madhigiri eBanking and Finance, Engineering nePharmacy neezvimwe zvikamu zvedzidzo zvakasiyana zvakadai seVeterinary Sciences, Mechanical Engineering, Psychology neBusiness Studies kubva kuUZ neNational University of Science and Technology (NUST).
“Kambani yeDelta Beverages yakazvipira mukusimudzira dzidzo, zvikuru munharaunda ine vanhu vanotambura asi vaine shungu dzekuti vange vachibudirira,” vanodaro Mai Tsungai Manyeza, avo vanove corporate affairs manager wekambani iyi. Chamangwiza weDelta Beverages, VaPearson Gowero, vanokurudzira vadzidzi ava kuti vave mucherechedzo wakanaka munyika uye kuti kana zvichibvira, vazobatsirawo vamwe vana vanotambura kuti vawane dzidzo.
“Pindai munyika munoita mabasa makuru anoyemurwa nekubatsirawo vamwe vana kuti vaone kukosha kwedzidzo,” vanodaro VaGowero.
Kunze kwechirongwa chemabhezari ichi, kambani yeDelta iri kubatsira zvakare vanhu vari munharaunda, zvikuru kumaruwa nekuvaka zvikoro senzira yekusimudzira dzidzo. Kubva muna 2002, zvikoro zvinodarika makumi mashanu zvakasimudzirwa munyaya dzezvivakwa nemari inosvika US$50 000 pagore.
Gore rino, kambani yeDelta Beverages ichange ichiparura mabhindauko matsva kudunhu reManicaland neMatebeleland South.
