Dhamu idzva rovakwa

28 Nov, 2014 - 09:11 0 Views
Dhamu idzva rovakwa

Kwayedza

MABASA ekurima kwaSadunhu Chiveso kwaShe Musana, kuBindura anotarisirwa kusimudzirwa zvikuru zvichitevera kuvakwa kuri kuitwa dhamu duku munzvimbo iyi murwizi rwaNyamapamu.

Dhamu idzva iri reNyamapamu riri kuvakwa kuburikidza nehomwe yeBindura Community Share Ownership Trust.

Sachigaro wechirongwa chekuvakwa kwedhamu iri vanova Sabhuku Ushongani, VaMichael Makumbe (64), vanoti chichasimudzira varimi venzvimbo yose iyi.

“Kanzuru yedu yeBindura iri kushanda zvikuru ichishandisa homwe yemari yeBindura Community Share Ownership Trust inove mari inobva kumakambani anoshandira ari mudunhu redu rino. Vechidiki vakawanda vemuno vakawana mabasa ekuvaka dhamu iri, pamusoro pazvo tichawana mvura yekuitisa mabasa akasiyana kuno,” vakadaro VaMakumbe.

Zvakadai, pakashanyirwa dunhu iri neKwayedza svondo rapera, vashandi vanodarika zana vakawanikwa vari mubishi kuvaka dhamu iri. “Muno tanga tiine dambudziko guru rekushaya mvura inokwanirana nezvipfuyo zvedu, zvikuru munguva yechirimo zvino tinoti dambudziko riya razopera kuburikidza nekuvakwa kwedhamu iri,” vakadaro. Ishe Musana, VaJoel Nyarumwe, vanova sachigaro weBindura Community Share Ownership Trust vanoti mudunhu ravo muri kuitwa mabasa akasiyana ebudiriro.

“Mune mabasa akawanda ari kuitwa kuburikidza nehomwe iyi ayo anosanganisira kuvakwa kwezvikoro nemakiriniki. ‘‘Zvibhorani zviri kucherwa uyewo zvitsaru zvichigadzurudzwa,” vakadaro.

Share This:

Sponsored Links

We value your opinion! Take a moment to complete our survey