Kwayedza
Tandayi Motsi
KAMBANI huru mune zvenhau nekudhinda munyika muno, yeZimpapers Group, yakabatsira sangano reIsland Hospice & Healthcare nemari inosvika $20 000 yekurwisa chirwere chegomarara.Zimpapers yakaunganidza mari iyi zvichitevera chirongwa chayakaita cheCancer Power Walk gore rapera.
Chirongwa ichi — icho chinoitwa gore negore — chine chinangwa chekupa chenjedzo kune veruzhinji pamusoro pechirwere chegomarara uye nekuunganidza mari yekubatsira vari kutambudzwa nedenda iri.
Gore rapera, chirongwa ichi chakaitwa muHarare, Bulawayo nekwaMutare uye chakapindwa nezviuru zvevanhu.
Chirongwa cheZimpapers Cancer Advocacy Campaign chiri kuitwa zvichitevera chibvumirano chekurwisa kupararira kwechirwere chegomarara icho chakanyoreranwa pakati peZimpapers Group neIsland Hospice mugore ra2015.
Pasi pechibvumirano ichi, Zimpapers inoshandisa mapepanhau ayo nenhepfenyuro mukushambadza mashoko echenjedzo pamusoro pegomarara.
Mai Beverly Sebastian, avo vanova director weIsland Hospice vanotenda Zimpapers nekuvatsigira mukurwisa gomarara nezvimwe zvirwere.
“Hukama hwedu neZimpapers huri kuramba huchitipa mikana yakakosha yekupa chenjedzo pamusoro pekuchengetwa kwevarwere vepanhowo negomarara. Zvisinei nezvimhingamipinyi zviri kusanganikwa nazvo munyaya dzeupfumi, Zimpapers iri kuramba ichizadzikisa zvayakavimbisa izvo zvinoratidzwa nechirongwa chayo chePower Walk.
“Chirongwa ichi chiri kuenda chichikura gore negore uye chichipindwa nevanhu vakawanda pamwe nekukusha mashoko kuruzhinji,” vanodaro. Mai Sebatsian vanoti mari iyi ichashandiswa mukutenga mishonga inotarisirwa kubatsira zviuru zvevarwere.
“Mari yakaunganidzwa kuburikidza nechirongwa chekufamba chakaitwa muna 2018 ichabatsira zvikuru mukutenga mishonga yekumapazi edu ose anosanganisira kuBulawayo, Harare, Mutare neMarondera. Uyu muenzaniso wakanaka zvikuru wekudzorera kunharaunda apo zviuru nezviuru zvichabatsirika,” vanodaro.
Izvi, vanodaro Mai Sebatsian, zvinoratidza kuti gore rino ratanga paine tarisiro yebudiriro huru munyaya dzeutano apo bazi reutano nekurerwa kwevana riri kutungamirira zvirongwa zvakasiyana zvekusimudzira nyaya dzeutano munyika izvo zvinosanganisira kuchengetwa kwakanaka kwevarwere vepanhowo.
“Kuburikidza nemushandirapamwe neZimpapers uyu, Island Hospice ine chinangwa chekupa chenjedzo maringe nekuchengetwa kwevarwere vepanhowo takatarisana negomarara nezvimwe zvirwere zvisingatapuriranwe (non-communicable diseases (NCDs) kuitira kudzivirira kurasikirwa neupenyu zvisina tsarukano,” vanodaro.
Mukushi wemashoko kuZimpapers, Muzvare Beatrice Tonhodzayi, vanoti kambani iyi ine chishuwo chekupa chenjedzo kune veruzhinji pamusoro pegomarara nezvimwe zvirwere zvisingatapuriranwe.
“Gomarara riri kushungurudza zvikuru munyika muno uye vanhu vakawanda vari kufa nezvirwere zvegomarara zvakasiyana mumakore ano. Kunyangwe zvazvo veruzhinji vave neruzivo pamusoro pegomarara rakadai serepazamu neremuchibereko, pane gomarara rinobata vanhurume uye nevana iro risingazivikanwe zvakawanda nezvaro.
“Tinotenda kuti tine basa rekutungamirira hurukuro dzenyaya dzerudzi urwu kuitira kuti pose pazvinokwanisika, vanhu vatore matanho ekudzivirira zvirwere izvi uye vavhenekwe nguva ichiripo kuitira kuti varapwe vachipora,” anodaro Muzvare Tonhodzayi.
Anorumbidza makambani nemapoka ose akabatsira nekutsigira chirongwa cheZimpapers 2018 Cancer Campaign.
Vamwe vakatsigira chirongwa ichi vanosanganisira Beta Holdings, National AIDS Council, Medirite Healthcare, Medirite Distribution, CIMAS, FBC Bank, Tanganda, Homelink, First Mutual, Megafest Holdings, Manicaland Motoring Club, Corporate24 Hospital Group, Ngoda Granites neZimbabwe National Family Planning Council.
