Kushanda kweSeed Co neZfu

16 Nov, 2018 - 00:11 0 Views
Kushanda kweSeed Co neZfu VaPaul Zakariya vanove ZFU executive director vakamira pasitendi yeSeed Co nevashandi vekambani iyi

Kwayedza

GORE negore kambani huru muZimbabwe pakuuchika nekutengesa mbeu dzepamusoro, yeSeed Co, inobatana nesangano guru rinomiririra varimi, reZFU kuronga musangano wecongress apo pavanosangana nevarimi vanobva kumatunhu ose enyika.

Gore rino ra2018, ZFU yakaita congress iyi kuGweru, kudunhu reMidlands ikabatanazve neSeed Co semakore ose pasi pedingindira rinoti, “Towards a Market Driven Agricultural Transformation”.

VeSeed Co vanogarotora mukana uyu kuti vanzwe zvichemo zvinosangana nevarimi kumatunhu avo avanobva vachionawo kuti vobatsira varimi ava.

Seed Co yairatidzirawo mbesa dzayo dzemhando dzakasiyana-siyana. Madhumeni eSeed Co aivawo bishi vachinyatsotsanangurira varimi mbeu dzinoita kumatunhu avo dzichivapa goho riri pamusoro sezvo kurima riri bhizimisi.

Madhumeni eSeed Co aya aiudzazve varimi kuti vanofanira kugadzirira mwaka nekutenga zvinoshandiswa mukurima paine nguva zvakaita sembeu nezvimwewo kuti murimi abudirire mubhizimusi rake rekurima.

Goho rinopundutsa rinobva mukusarudza mbeu kwayo.

Nekune rimwe dimi, madhumeni eSeed Co vaishamarara vachidzidzisa varimi nezve”slogan” yavo yanetsa munyaya dzezvekurima inoti, “ Kuti Seed Co ndokuti mbeu . . . kuti mbeu ndokuti Seed Co.

Varimi vaiva pamusangano uyu vaiudzwawo dzimwe nzira nechenjedzo kuti murimi anofanirwa kurongera mwaka uri kufungidzirwa kuti mvura ingangoita shoma nevanoona nezvemamiriro ekunze.

Nzira idzi ndedzinoti kurima kwemakomba, kukasika kudyara mbesa mukutanga kwemwaka, zvakakoshera kuti mbeu ikure mumunda musina masora, kushandisa mbesa dzetsanga diki semapfunde, kudyara mbesa dzakasiyana-siyana nezvimwewo.

Madhumeni aya aikurudzirawo varimi kuti vashandise mbeu dzakauchikwa uye kuti vatenge mbeu muzvitoro zvinokurudzirwa nemadhumeni eHurumende, kwete pamukoto.

VeSeed Co vaikurudzirawo kuti varimi vachinjanise mbesa mumunda, sekuti mwaka wapfuura kana mumunda maive nechibage, mwaka uno vanofanirwa kuisa chirimwa chakafanana nesoyabeans kana nzungu kuitira kuti zvirwere zviite zvishoma uye mbesa yesoyabeans inosiyawo hudyo hunozoshandiswawo nechibage mwaka unotevera.

Varimi vakakurudzirwa neSeed Co kuti vagadzire mapoka pakutenga mbesa dzavo nezvimwewo zvinoshandiswa mukurima kuitira kuti mitengo inogona kuderedzwa sezvo vanenge vatenga zvinhu zvakawanda seboka panguva imwe chete.

Share This:

Sponsored Links

We value your opinion! Take a moment to complete our survey