Kususukidza rungano

24 Jun, 2016 - 00:06 0 Views

Kwayedza

Munyaradzi  Gunduza

Zvinoitwa nevatambi

kususukidza rungano

(Tinoenderera mberi)

Tapera anorarisa paakanga akachengeta Karinge neshamwari dzake vaive muimba yevasungwa vaMambo Chikwirandaombera. Izvi zvinoita kuti Karinge neshamwari dzake vatize vachinopotera kwaMambo Tineshungu.(d) VaMatose vaiva hanzvadzi yaMambo Chakaingesu

Vanodzidzisa Karinge kudeketera midzimu yedzinza ravo. Izvi zvinoita kuti asazonetseka kusuma midzimu yavo paaida kurwisa Pondai akanga apamba umambo hwavo. Vanochengeta Karinge neshamwari dzake kwemazuva mashanu vabva kunopotera kwaMambo Tineshungu zvinoita kuti vakwanise kupota vachiongorora shanduko dzese dzaive dzaitwa naPondai mudunhu ravo, vasati vatanga kumurwisa.

(e) Chivhere aiva mukuru wemauto aMambo Tineshungu.

Anokanda Karinge muchidziva chaive negarwe, zvinoita kuti Karinge azouraya garwe raMambo Tineshungu mushure mekurwisana naro zvakaomarara. Anorambidza Karinge kuti apinde mumuzinda waMambo Tineshungu kuti anotora hanzvadzi dzake dzavaive vatapa. Izvi zvinoita kuti Karinge azoronga hondo yekurwisa Mambo Tineshungu nekuvaparadza ndokutora hanzvadzi dzake.

Tinoenderera mberi svondo rinouya.

Zvinyorwa izvi zviri mubhuku rakanzi Ongororo yeNhetembo neMabhuku Shona O-Level.

SHOKO HARIVHIKWI

Mubvunzo nemhinduro yesvondo rakapera.

18. Sarudza nhetembo mbiri dzakanyorwa navananyanduri vakasiyana kubva muna Shoko Harivhikwi ugotaridza mashandisiro avanoita zvidavado. [25]

Vadzidzi munofanira kusarudza nhetembo mbiri dzamunoda asi dzakanyorwa nananyanduri vaviri vakasiyana.

Madaro munosungirwa kunyurura zvidavado zvinobuda mudetembo rimwe nerimwe muchipa tsigiro.

Nhetembo dzandasarudza ndeidzi; Rufu rwemhandara naAlex Chirumbwana uye Mhandu yemunhu naJesca Ruswaya-Marwiro.

Mudetembo raAlex Chirumbwana rinonzi Rufu rwemhandara, anoshandisa chidavado chehwevazwi sepaanoti, “Sarawe-we! I-w-e, muk-a ka-n-i!” Nyanduri anoshandisa chidavado chemubvunzonhando sepaanoti, “Wofawo here usina kusiya budzi?”

Nyanduri anoshandisa mutauro wekudimikira sepaanoti, “Mwana akaitwa karikiriki nevaya vasingabvaruri machira.” Nyanduri anoshandisa chidavado chechikuwo sepaanoti, “Hi-i pasi panodya!”

Nyanduri anoshandisa chidavado chedzokororo yepfungwa sepaanoti,

Pamuchatsva ndichawedzera moto.

Pamuchanyura munyanza, ndichawedzera mvura.

Nyanduri anoshandisa chidavado chefananidzo sepaanoti, “Muchafa makanyenama sembeva.” Nyanduri anoshandisa chimwe chidavado chenyaudzosingwi sepaanoti, “Mose muchati rororo.” Nyanduri anoshandisazve chidavado chehochekoche yepakati sepaanoti,

Pamuchatsva ndichawedzera moto.

Pamuchanyura munyanza, ndichawedzera mvura.

Mudetembo raJesca Rushwaya-Marwiro rinonzi Mhandu yemunhu, anoshandisa chidavado chekusandura urongwa hwemazwi sepaanoti, “Ibanga nematombo, zvatora hwake upenyu.” Nyanduri anoshandisa chidavado chezitadunhurirwa sepaanoti, “Zvose izvi, mabasa aro gogogo.” Nyanduri anoshandisa chidavado chefananidzo sepaanoti, “Anongodzivaira nemafakitori seari kutanda botso.” Nyanduri anoshandisa chidavado chehochekoche yekumavambo sepaanoti,

Kuriwana rokuchaira, motokari inorovera.

Kuriwana mumugodhi, unodhirika.

Nyanduri anoshandisa chidavado chemubvunzonhando sepaanoti, “Angagova ani, kunze kwababamukuru?” Nyanduri anoshandisa mutauro wekudimikira paanoti, “Kana zvake kumbotizira mukumbo kutsvimborume.”

Nyanduri anoshandisa chidavado chenyaudzosingwi sepaanoti, “Pidigu pidigu ndiye kwakadaro njo.”

Sarai muchiita tsvakurudzo yemubvunzo unotevera:

19. Sarudza nhetembo shanu kubva muna Shoko Harivhikwi dzinokusuwisa. Zvino chitsanangura zvinokusuwisa munhetembo imwe neimwe. [25]

Ndinokupai mhinduro yacho svondo rinouya.

 

Zvinyorwa izvi zvinowanikwa mubhuku rinonzi Mhinduro Yeuvaranomwe Mabhuku neNhetembo: Shona O-Level (Revised Edition).

Share This:

Sponsored Links

We value your opinion! Take a moment to complete our survey