Kwayedza
Muchaneta Chimuka
VARI mumabhizimusi madiki neari pakati nepakati vanoti vari kufara nekuwaniswa mukana wekuita mabasa avo vakasununguka, zvisinei nemamwe matambudziko avari kusangana nawo akaita sekushaikwa kwemari nekurozvwa nemakoronyera.
Kwayedza yakashanyira musika unogadzirwa midziyo yemumba yakasiyana, weGlen View Home Industry Complex, uri muHarare, ikawana richingova beswana revanhu apo vaitengesa nekugadzira masofa, matafura, mibhedha, mawadhiropu nezvimwe zvakawanda.
Mimwe midziyo inogadzirwa panzvimbo iyi inotokunda inotengeswa muzvitoro zvikuru zvine mbiri, unova mucherechedzo wekufambira mberi kuri kuita zvirongwa zveHurumende zvekupa masimba eupfumi kune veruzhinji.
Spencer Mukahanana (28) wekuGlen View Extension anoti anofara zvikuru nekushanda munyika yakasununguka achigadzira masofa ayo anoti anotengwa nemakambani makuru, kusanganisira vemahotera.
“Takatomboendesa odha yemasofa kune imwe hotera huru mushure mekunge vaona mabasa edu anoyevedza asi dambudziko ndiro ramaona kugedhi uko, kune makoronyera anongomirira kuchingura makasitoma edu vachiuya nawo kwatiri vachitengesa midziyo iyi kakapetwa kaviri.
‘‘Izvi zvinotidzingira makasitoma nekuti vanhu havazodi kudhurirwa.
“Rimwe dambudziko ndere kupisirwa zvinhu muno nekuti gore negore munototsva, asi hatizivi kuti moto wacho unenge uchikonzerwa nembavha here kana kuti kwete,” anodaro.
Daniel Makatare (35) – uyo ainge anotenga masofa pamuzinda uyu – anoti anofara nedanho riri kutorwa neZimbabwe rekupa vatema – kunyanya vechidiki – mikana yekuzvishandira.
Liberty Mawandukuse (35) anoti anogadzira mawadhiropu emhando yepamusoro asi anochema nenyaya yemakoronyera ayo ari kuvabira bhizimusi ravo.
“Makoronyera akazara kugedhi uko zvekuti anotopfeka masutu vachiuya kuzodhurisira makasitoma edu.
‘‘Kana ukangoramba zvavanenge vachida zvinenge zvava kutoreva kuti hauchawana makasitoma, vanotouya kuzoita mhirizhonga nekasitoma yako kana ikangopinda isina muperekedzi.
“Makasitoma kana akangoona pava neruzha, vanobva vatya kubirwa mari dzavo, vogumisira vaenda kune mumwe mutengesi iwe worasikirwa nemari,” anodaro.
Knowledge Mutangadura (25) anochemawo nenyaya yekushaikwa kwemari.
“Nyaya dzekutengesa midziyo nemari yepamafoni dziri kutirwadza muno nekuda kwekuti inochajwa imwe mari pamusoro. Tiri kuchema kuti kudai Zimbabwe itsva yaita kuti tiwane mari kumabhengi nekuti tiri kufira mafufu segonzo. Zvose zvatinoshandisa mukusona masofa uye kuveza zvinoda mari yemusvo,” anodaro.
Kuchiti Marcelo Mutema (20) anoti akakwanisa kutenga mbudzi dzake shanu dziri kumusha kubva mubhizimusi rekutengesa mibhedha uye ane tarisiro yekuzotenga mombe munguva pfupi iri kutevera.
Mai Maria Manyika, avo vanotengesa mawadhiropu nemakitchen unit panzvimbo iyi, vanotiwo vakakwanisa kutenga sitendi yekuvaka imba, motokari pamwe nekubhadharira vana vavo mari dzechikoro kuburikidza nebhizimusi iri.
“Makoronyera nekupisirwa midziyo yedu muno ndiro dambudziko. Asi ndinofara kuti muZimbabwe yakasununguka vanhu vari kuita izvi vachabatwa nemutemo. Tinofara sevanhu vatema kuti tava kukwanisa kuita mabhizimusi anotipa chouviri munyika medu. Tikaenda kune dzimwe nyika handifungi kuti tinombowaniswa mukana wakadai wekutengesa pamadiro,” vanodaro.
