Kwayedza
Muchaneta Chimuka
MURUME wekuChitungwiza akaigochera pautsi apo akapaza imba yevaridzi achifunga kuti vainge vasipo, ndokubatikidzwa achangopinda izvo zvakaita kuti asungiswe.
Patience Kaseke (32) wepanhamba 1605 Unit J akasungiswa naTendai Kapuya (29) wepanhamba 7330 Unit K mushure mekubatikidzwa achida kuba mumba make.
Mutongi wedare reChitungwiza Magistrate’s Court’s, Yeukai Chigodora, akapa Kaseke chirango chekugara mujeri kwemwedzi 12 ndokuzomubvisira mwedzi mitanhatu pachirango ichi paine chitsidzo chekuti haafanire kupara imwe mhosva yerudzi urwu mumakore mashanu anotevera.
Akaenderera mberi nekumubvisira mwedzi mitanhatu yainge yasara ndokuti anofanira kunofondoka kwemaawa 210 paSeke 12 Primary, ikoko kuChitungwiza.
Muchuchisi Tendai Katonha akaudza dare kuti husiku hwemusi wa19 Gunyana gore rapera, Kapuya akange ari pamba pake apo akanzwa musuwo uchigogodzwa asi haana kudaira.
Kaseke akabva atora mukana uyu achifunga kuti pamba apa pakanga pasina vanhu ndokushandisa chigero chaaiva nacho kuvhurisa musiwo wemba.
Paakanga ave mukati, ndipo paakashamisika kuona muridzi wemba arimo uyo akabva amubata ndokumuendesa kumapurisa.
Kaseke ari kubvuma mhosva yake. Dare riri kumutonga nemhosva yekupinda muchivanze chevaridzi pasina mvumo pasi pemutemo weSection 131(2) of the Criminal Law Codification and Reform Chapter 9:23 Unlawful entry.
