Kwayedza
REKETE CHINDAU: ISHMAIL PENYAI
NDAUWE ndauwe! Tinode kubonga Marure ngemvura iri kunaya mazuwano. Kunyazi mumunda mwakhona amuzi kuzohamba kahle asi mvura inondodiwa kuitire pfuma yedu nekuti mikowa yedu iyi isaphwa.
Vhiki rino tiri kureketa ngezvipoko. Kune ndaa dzakawanda pashi reshe dzinorekethwa ngezvipoko. Ukandoamure gama rekuti chipoko, munhu weeshe unotya ngekuti chiro ichi achibviri, chinozwi chinotyisa yaemho.
Chinyini chinozwi chipoko? Pose pose, chipoko nacho achizwisisiki kudai ngenzuzu. Zveshe zviri zviiri zvine zvierwaerwa zvazvo. Amweni anoti chipoko chinouya kubudikidza ngefiro isikazi kuhambe chakanaka, kushongororwa ere ngeumweni.
Zveshe izvi ngatizvirekete teitutsira apo tatanga kureketa ngechianhu chedu.
Saka kweirekethwa zviya, anhu anoti mweya wake unonga usikazi kwende kunoenda anhani.
Unonga weipepesheka nebani nenyika, weitsvaratsvara weipenye uyo wakamushumba atei amuthumba. Ndicho chipanga chiparure chacho, kumuthumba.
Takamboite nyaya yakashupha yaemho muguta reBhuruwayo. Kwakaite chipoko chaipinde mumabhawa eTshabalala neSizinda chaiya nezina rekuti Jeni. Kubva amuna edu aya anoende kumabhawa, anondoti chaoneka cheshe ngachiposerwe mukanwa, akakumana nacho mazuwawo.
Chakaite chidoko chapinda amuna woye. Neni nani ndakambokumana nacho nemuzukuru wangu unozwi Maguwanyuchi. Tainga teibve Sizinda tiri pamarobhoti anodarike ana echikoro. Ndakazozwa Maguwa oti, “Mbuya mai Rinda chipoko icho”.
Isisu taitobva hedu kumabiko kwamukoma kuSizinda. Iye wakati wangaazwe muiri wake kubvunda, icho chakaeme pamarobhoti chakapfeke zvichena kunga nesi. Chipoko ichi chaiya chakanaka uyehe chaichena.
Apana mwamuna waimwe doro waikorere kuchiona nemunakire wacho uyu.
Kumweni kumakanyi unozwa anhu eiti anoone mwoto.
Amweni unozwa eiti ngana uya wakafa unopetuka usiku huya. Unomuzwa eigwedemudze mumhatso mwake eigwinye kurongedza ingatei uchiri kufurukuta.
Imwi woye, kana zvauya ungazvidini. Kwaakutoshanda nezviripo. Kumweni unozwa eiti, kana kwasvipa zviyana, pane mhatso inooneke mwoto weiti n’anin’ani kunga chibani kubeni apagari anhu. Jeni uyu wetareketa ndiye uyu wakaite mukurumbira yaemho murokesheni rweTshabalala neSizinda mukorewo.
Kana atori atori enhau, akamwire mvura ngekunyora ngendombi iyi yaipfeke hembe tshena manheru aya.
Waiya ari pabasa kunga manesi, zveizosiya hazvo kuti uyu waiata naarwere ake aaibva nawo kumabhawa.
Saka tingati aya ndiwo amweni mamina etinokumana nawo mutsika nemagariro edu echiNdau.
Tinokumbirawo kuti mututsirewo zvemungadai mweiziya pamusoro pechipoko panhamba: 0714 200 007
