Kwayedza
Muchaneta Chimuka
SANGANO reAfrican Agricultural Technology Foundation rinoti rave nemakore anosvika mana richiita ongororo yezvirimwa zvakadai sematomatisi, mapfunde nemhunga richishandisa mbeu dziri kubva kunyika dzinosanganisira India, Brazil, China neAustrallia idzo dzinopa goho rakapetwa katatu kana dzichienzaniswa nedzemunyika muno.
Vachitaura pazuva rekumemwa kweminda iyo vari kutira ongororo iyi kuArt Farm kuPomona, muHarare munguva pfupi yadarika – VaDonald Mavindidze vanova director (commercialization) kusangano iri vanoti vakaunza mhando yembeu dzinodarika 16 dzemapfunde, mhunga nematomatisi idzo vari kuita ongororo parizvino.
“Mukati meongororo yedu, tinenge tichienzanisa mbeu dzemapfunde nemhunga idzi dzagara dzichirimwa nevarimi vemuno nedzatiri kubva nadzo kunze kwenyika asi dziri mhando yemahybrid. Mbeu dzemuno dzinotirira zuva zvimwe chetezvo nedzekunze asi musiyano uripo ndewekuti mahybrid anopa goho rakapetwa kaviri kana katatu kana zvichienzaniswa nedzechinyakare (open pollinated varieties). Nokudaro kana ongororo iyi ikafamba zvakanaka tichaona varimi vedu vemuno vachiwana goho rakakura,” vanodaro.
Vanoti kuuya kwembeu dzekune dzimwe nyika dzakadai seIndia, Brazil, China neAustrallia kuchabatsira varimi kuti vatore kurima sebhizinesi nekuti vachange vava kuwana misika yekunze.
“Kana varimi vemuno vakagona kutevedza zvinodiwa mukurima zvirimwa izvi, vachakwanisa kutengeserana nedzimwe nyika vachiwana mari yekunze uye zvinovandudza ruzivo rwekurima mavari. Tine mhando dzematomatisi dzakasiyana dzatiri kurima seongororo dzinodarika 16 nokudaro varimi vachange vava nesarudzo yembeu dzavanoda kurima zvichienderana nemamiriro ekunze uye ivhu rematunhu avanorimira,” vanodaro Mavindidze.
Mhando dzembeu dzavanoshandisa dzinodaidzwa kunzi Seeds 2B vanoti hadzibatwe nezvirwere nyore uye mapfunde nemhunga haadyiwe neshiri zvenhando.
“Mbeu dzedu dzemapfunde nemhunga dzinotipa goho rematani 3,5 pahekita kana zvichienzaniswa nedzemuno dzakadai seMarcia inotipa matani 2,5 pahekita. Zvakare takaita ongororo munzvimbo dzakadai seChiredzi, Chisumbanje neSave tikaona kuti dzinotirira zuva nokudaro dzinogona kurimwa pasina kushandisa madiridziro zvinova zvinobatsira varimi kuti vawane goho kunyangwe munguva ino yekusanduka kwemamiriro ekunze,” vanodaro.
VaMavindidze vanoti dambudziko remakonye emhando yefall armyworm ndiro riri kudzorera chirongwa chavo kumashure sezvo achibata kunyangwe mbeu diki.
