Kwayedza
MUSIKANA wekudura kuti aigara pasi pemvura nenjuzu kwemakore akawanda anoti pasipoti yake yakanotorwa nenjuzu kumuzinda unopa magwaro ekufambisa aya kwaRegistrar-General, muHarare, ikaendwa nayo pasi pemvura sezvo akange asingatenderwe kubuda munyika muno.
Charity Maunganidze (30) anoti akaenda kumahofisi ekwaRegistrar-General mugore ra2006 ndokuita zvose zvaidiwa kuti atore pasipoti asi akazoshamisika kuiona yava pasi pemvura achiiratidzwa nenjuzu kuti yaiva yachengetwa nevakuru “venyika yepasi pemvura” kuti asakwanise kubuda muZimbabwe.
“Pataigara pasi pemvura paiva nevakuru vedu vaisanganisa King naQueen vaiva njuzu vose. Ndivo vaiva vakachengeta pasipoti iyi,” akadaro achiratidza Kwayedza mapasipoti ake maviri.
Musikana uyu aiti akabuda kunze, akaenda kupassport office, aisvikoishaya zvinova zvaimushamisa.
“Pasipoti yekutanga ndakaitora ndichiri kushandisa zita rekuti Benadette Makurumidze. Ndakazosandura zita rekuti Benadette nekuda kwekushungurudzwa kwandaiitwa nezvose zvaiitika kwandiri. Ndakazozviti Charity, apo ndakatora pasipoti yechipiri nezita idzva iri yekutanga iyi yashaikwa.”
Charity anoti zvose zvitupa zvekuchikoro nematsamba ekuzvarwa akazvisandura ndokuzviisa muzita rake idzva. “Ndakaenda kunotora pasipoti itsva iyi mumwedzi waJune (Chikumi) ikabuda mushure menguva pfupi. Ndakazoshamiswa zvakare apo ndakanamatirwa ndikataurirwa kuti pasipoti yangu yekutanga yakanga yave kuwanikwa kumahofisi ekutora zvitupa aya,” akadaro.
Akavedzera achiti akazoenda kumahofisi ekwaRG ndokunopihwa pasipoti iya yaimboshaikwa, iyo aiona iri kunyika yepasi pemvura.
“Kuti pasipoti iyi yakatorwa sei nenjuzu kana kuti yakazodzoswa sei hapana anozviziva. Izvozvi ndinotova nemapasipoti maviri anoti yekutanga ine zita rekuti Benadette Makurumidze neitsva ine zita rekuti Charity Makurumidze.”
Charity anoti kuburikidza nenyaya yekutambudzwa kwaakaitwa nemweya yetsvina iyi kwemakore akawanda, haadi kuonana natete vakange vamupinza mukugara nenjuzu ava.
