Kwayedza
Munyaradzi Gunduza
NDINOFA NDAEDZA
10. Tsanangura zvimhingamupinyi zvishanu zvinosangana naRevai murwendo rwake kuenda kwaMutenure uchiratidza kukunda kwaanoita chibingamupinyi chega chega muna Ndinofa Ndaedza. [25]Vadzidzi munofanira kudoma matambudziko mashanu (5) anowira Revai achienda kwaMutenure nekukunda kwaanoita dambudziko rega rega, munoita izvi muchipa tsigiro dziri murungano. Mubvunzo uyu wakupai zita remutambi saka pakudoma pfungwa munotarisirwawo kuburitsa zita rake sekuti; “Revai anosangana nedambudziko rekusaziva kwaaienda. Izvi zvinoonekwa paanenge achitadza kurangarira zita regomo rinonzi Mutenure raive pedyo nekwaaida kuenda kwaive nehama dzake kwaShe Machingauta. Anokunda nekurangarira kuti aifanira kuenda nekumaodzanyemba kwaive negomo rinonzi Mutenure sekutaurirwa kwaakanga amboitwa naVaMhake.” Mamwe matambudziko anomuwira: nzara (kundiso) mutakura waakapiwa naTafirei, kupfuura tsuro, kudya michero yesango, kuba mbudzi yaShe Zindoga, kuneta (kundiso), kuzorora paairara mumiti usiku, zvikara zvesango — shumba, magora, mapere (kundiso), kupfura bere nemuseve richibva rafa, kukumbira kuvadzimu kuti shumba dziende dzichibva dzaenda, kutapwa kwaShe Zindoga (kundiso), kutiza usiku vanhu vakarara, kusungwa kwaShe Dendera (kundiso), kusunungurwa naPondai naChigange, kurohwa netsvimbo kwaShe Dendera (kundiso), anonaya ega kwapera mazuva.
11. Ndezvipi zvinhu zvinowanikwa murungano Ndinofa Ndaedza zvinoburitsa chitendero chevadzimu? Tsigira pfungwa iyi nezvinoitika murungano urwu. [25]
Munofanira kujekesa kuti vaitendera muvadzimu nenzira dzipi. Zvimwe zvamunogona kushandisa; midzimu yekwaMhake inoramba kuti Revai achengetwe mudunhu raShe Chokupamba, kuchema kwaRevai kuti midzimu imutarise parwendo rwake, kuuraya kwaanoita tsuro achibva atenda midzimu, kukumbira kuvadzimu kuti vamudzingire shumba dzakanga dzava kumuvhiringidza parwendo rwake dzichibva dzaenda, kuchema kwaShe Dendera kuvadzimu vapisirwa musha, kunamata kunoita Ishe Machingauta pamuuyu uchibva wazunguzika, kuvigwa kwaShe Machingauta naRevai mubako kunogashirwa nevadzimu, kugadzwa kwaRevai ushe kunotenderwa nevadzimu.
12. Sarudza vatambi vashanu vari muna Ndinofa Ndaedza ugoratidza zvinoitwa nemumwe nemumwe wavo zvausingafarire.
Pamubvunzo uyu unofanira kudoma chausingafarire chinoitwa nemutambi wopa tsigiro yacho KWETE kuvenga mutambi. Ini handifarire zvinoitwa nevatambi vanotevera: VaMhake — vanonyima Revai chikafu vachimuswedza nenzara asi achivaitira basa repamusha nekutsvaga usavi, vanodzinga Revai pamusha pavo asina chaatadza, Ishe Chokupamba — vanopamba pfuma yaVaTiritose mushakabvu yaiti mombe, mbudzi nehwai, kuramba kudzosera mauto enyuchi pfuma yaVaTiritose yavaive vatumwa naRevai, Ishe Zindoga — vanoisa Revai muutapwa asina mhosva, kukuvadzisa Chandafira nemombe, kusara vachishungurudza Chandafira nenyaya yekubirwa mbudzi naRevai, VaMazvikokota — kurova Revai netsvimbo pamusoro peziso, kunyepera dare raShe Dendera kuti vakamhanyiswa naRevai kusvika kumba kwavo, Ishe Dendera — kuramba kuteerera zano raVaChiremba rekuti varegerere Revai aende mberi nerwendo rwake, kurova Chigange pabendekete netsvimbo.
Mhinduro dzemibvunzo iyi dzizere dziri mubhuku rinonzi Mhinduro Yeuvaranomwe Mabhuku neNhetembo: Shona O-Level (Revised Edition)
NDIKO KUSASANA
1. Ndiani anganzi ndiye mutambi mukuru muna Ndiko Kusasana? Tsigira mhinduro yako zvizere nezvinoitika murungano urwu. [25]
Mubvunzo uyu uri kuda kuti uratidze mutambi waunoona sekuti ndiye ane zviito zvizhinji zvinopindirana nenyaya. Apa unofanira kuratidza chinoitwa nemutambi wopa tsigiro uchijekesa zvazvinoita pakususukidza nyaya uye zvinoitwa nemutambi ngazvive zvisere kana kupfuura, zvakangonaka. Maonero anosiyana asi mumwe anokwanisa kuti ndiMugadzi nekuti: anonyepera Sekai kuti aienda kumusangano webhizimusi rake achienda kuMarondera, anodanana naLily aine mukadzi wake, anotukana naSekai paanobva kuZengeza akadhakwa, anotuma Sekai kuKwekwe kumba kwemukoma wake, anosungisa Sekai nemapurisa, anoroora Lily, anoputsa mupikicha wake naSekai waive kumadziro, anovigira Sekai makiyi epasefa nezvimwewo.
2. Tsanangura zvinhu zvishanu zviri kushoropodzwa nemunyori waNdiko Kusasana? [25]
Zivai kuti chiri kushoropodzwa nemunyori ndochinhu chaanoda kutiudza kuti chakaipa muupenyu kuburikidza nekuchijekesa achishandisa vatambi vari munyaya. Apa munofanira kupa tsigiro mbiri yechinhu chinenge chichishoropodzwa nemunyori. Zvimwe zvacho ndeizvi: munyori ari kushoropodza chipfambi – chinoputsa dzimba, chinorovesa; anoshoropodza kunyepa — kunoputsa dzimba, kunopinza vanhu mumatambudziko akaita sekurohwa; anoshoropodza kufurirwa – kunopinza mujeri, kuputsisa dzimba, bopoto; anoshoropodza kuba – kunouraisa, kunopinzisa mujeri; anoshoropodza kuita zvinhu zvisiri pamutemo wenyika — kunosungisa nemapurisa, kunorovesa. Munyori anoshoropodza vanatete vanoputsa dzimba dzevazukuru vavo — amai Gatsi naFadza.
3. Vatambi vanotevera vanosusukidza sei rungano ruri muna Ndiko Kusasana? (a) Mugadzi (b) Sekai (c) Mukomana wekusiraha (d) Fadza (e) Amai Gatsi. [25]
Vanyori munofanira kupa zvinoitwa nevatambi zvakakosha (cause) zvinozokonzera zvimwe zvinhu kuti zviitwe (effect), nyaya ichibva yaenderera mberi. Tangai nekuratidza kuti mutambi ari kubuda ari ani munyaya (identification). Semuenzaniso; “(a) Mugadzi aiva murume waSekai. Zvaanoita: anoenda kuMarondera kunoona tete vake amai Gatsi zvinoita kuti vazomutsvagira mumwe mukadzi ainzi Lily aive mwana weshamwari yavo.” Ndizvo zvamunenge muchingoita kusvika mapedza vatambi vese vari pamubvunzo. Zivai kuti pamubvunzo uyu, chinokonzerwa chinofanira kunge chiri chiriporipotyo (immmediate effect) kwete zvakazoitika pava paya kana kumagumo kwenyaya. Pamutambi mumwe chete munofanira kunyurura zvinhu zviviri zvaanoita muchiratidza zvazvinoita kususukidza nyaya.
Nhare 0772 610 360
