Kwayedza
MUDZIDZISI wepachikoro cheRio Tinto Secondary School chiri kwaMubaira, kuMhondoro — uyo akatsengwa-tsengwa sikarudzi yake nemumwe murume apo vairwira musikana — anonzi akabuda muchipatara uye ari kupora ari kumba kwake.
Shepherd Dzimbanhete (43) wemubhuku raParaiwa, kwaMambo Mashayamombe, anonzi akatsengwa-tsengwa nhengo dzake dzakavandika kusara dzaita kunge “minzi meat” naMaxwell Chiweshe (36), uyo anogara mubhuku raChiweshe, mudunhu rimwe chete iri.
Vaviri ava — avo vose vane madzimai — vanonzi vairwira musikana anonzi Susan Mukandi (31) uyo anoshanda murimwe bhawa riri paMubaira.
Pakakuvadzwa mudzidzisi uyu, akazomhanyiswa kuchipatara cheMubaira uko akanodarikidzwa kuchipatara cheChegutu kunova kwaakanosonwa asati azoburitswa muchipatara mushure memazuva.
Mutauriri wemapurisa eZimbabwe Republic Police (ZRP) kudunhu reMashonaland West, Inspector Clemence Mabgweazara, vanoti Dzimbanhete akaburitswa muchipatara uye ari kupora ari kumba.
“Kuburikidza nenyaya iyo yakaitika svondo rakapera paseri uye inosuwisa zvikuru – yemudzidzisi wepaRio Tinto Secondary uyo akarumwa nhengo dzesikarudzi vachirwira mukadzi, Shepherd Dzimbanhete – uyo akarumwa zvakaipisisa naMaxwell Chiweshe, tinotenda nekuti akabuda muchipatara. Ava kumba uye utano hwake huri pari nani.
“Maxwell Chiweshe hatisati tamuwana asi semapurisa tiri kumutsvaga kuti asangane nemhosva dzake kumatare edzimhosva nekukuvadza uko anonzi akaita munhu. Mapurisa edu epakamba yeMubaira vari mubishi kumutsvaga” anodaro mutauriri weZRP uyu.
Vanoyambira veruzhinji kuti vasatore mitemo vachiuisa muhomwe dzavo kana vatadza kuwirirana.
Insp Mabgweazara vanoti kune vari kuziva kuna Chiweshe vanokwanisa kuvazivisa panhamba dzinoti (067) 25505 kana 0712 520 412.
“Mhosva hairovi, tinoti kuruzhinji hatibatsiranei tikwanise kubata murume uyu,” vanodaro.
