Kwayedza
VAKAUYA, vakatambirwa, pakakurukurwa, matare akasiyana-siyana, vamwe vakapihwa mhenduru, vamwe vachisiya zvigaro zvakavange vainazvo vachipa mukana kune vamwe. Vamwewo vakaturawo mashoko avo kokupedzisira, mashoko okuoneka, vatsva vachiturawo avo kekutanga.
Vatungamiri vakange vari pamusangano weSadc wakaitwa kuVictoria Falls musi wa17 na18 Nyamavhuvhu vanosanganisira: VaIan Khama (Botswana), VaJoseph Kabila (DRC ), VaThomas Tabane (Lesotho), VaHery Rajaonarimapianina (Madagascar), Muzvinafundo Peter Mutharika (Malawi), VaNavinchandra Ramgoolam (Mauritius), VaArmando Guebuza (Mozambique), VaHifikepunye Pohamba (Namibia), VaJames Alix Michel (Seychelles), VaJacob Zuma (South Africa), VaJakaya Kikwete (Tanzania), VaManuel Domingos Vicente (Angola), VaSibusiso Barnabas Dlamini (Swaziland), VaGuy Scott (Zambia) naPresident Robert Mugabe.
Vamwe vatangumiri vakauya nemadzimai avo sezvo muSadc musisina mutungamiri wechidzimai.
Vakaperekedzwawo nemakurukota avo. Itariro yeZimbabwe kuti yakagona kumisa musangano unoendeka sezvo vamwe vaiti musangano uri kuitwa nyika isina mari. Zvave kwamuri vaverengi kuzvionera kuti Zimbabwe inoronga, kuita musangano wakapindwa nevanhu vanopfuura 700.
Tokorokotedzawo mutungamiri wenyika President Mugabe nekupihwa sando dzokuve sachigaro weSadc kubva gore rino kusvika gore rinouya. Zvimwe chetewo nemakurukota eHurumende yeZimbabwe vanenge vari vana sachigaro vezvirongwa zvakasiyana-siyana, sezvekudyidzana nenyika dzokunze kana utano.
Sando dzine mazera uyewo dzinoshanda zvakasiyana, asi chikuru ndechokuda kugadzirisa zvinhu. Sekutaura kwakaitwa naPresident, idzi inyembe dzavo pamwe chete nemhuri yeZimbabwe. Vakagamuchira vaenzi vakatura mashoko avo ari maringe nezvakakoshera dunhu reSadc, uyewo vakadzoka kumashure sezvavanogaroita vachida kuonesa dunhu rese kuti takabva kupi, tiri papi uye tiri kuenda kupi. Upfumi hwedunhu hunopararira mune dzimwe nyika nokuti zviwanikwa nezvicherwa zvinongotengeswa zvakadaro inyaya yavabatawo.
Vakaratidzawo kushushikana kuti tiri vanhu vasingazivi magamba akarwira rusununguko rwedunhu neAfrica yese zvayo, ndokutsutsumwa kuti Sadc haisati yapa mushakabvu Mwalimu Julius Nyerere chiremera chakakosha sezvo iye neTanzania vakatakura mitoro yehondo dzerusununguko rweZimbabwe, Namibia neSouth Africa.
President Mugabe vakatendawo Retired Brigadier-General Hashim Mbita vokuTanzania nekushandira rusununguko rwedunhu, uyewo nekubatsira kuburitsa nhoroondo yerusununguko rwenyika pfumbwamwe mudunhu. Mabhuku akanyorwa pasi peHashim Mbita Project akaturwa pamusangano uyu.
Tinokorokotedzawo mutungamiri weBotswana President Khama nekusarudzwa kuve mutevedzeri wasachigaro.
Zvoreva kuti Botswana ndiyo inenge yave kupihwa sando dzakapihwa President Mugabe musi wa17 Nyamavhuvhu 2015. Kusarudzwa kweBotswana kune vamwe vari kutoti zvavo zvaita. Vamwewo vakasarudzwa vanosanganisira vatungamiri veSouth Africa neLesotho (VaZuma naVaMatabane) kuti vatungamirire bazi re”Organ on Politics, Defence and Security Co-operation”.
Iri ibazi rinoona nenyaya dzezvematongerwo enyika nekuchengetedzwa kwerunyararo mudunhu, nokuti kana pakaita mhirizhonga, zvese zvakakurukurwa kuVictoria Falls zvinoshaya basa. Budiriro iri kutsvagwa inobva yashaikwa.
Tinokorokotedzawo munyori mutsva weSadc, Dr Stergomina Lawrence Tax nehutungamiri hwavo vachishanda neHurumende yeZimbabwe kuti musangano ubudirire. Ndiwo musangano wavatungamiri wekutanga vari pachigaro wavakaronga nechikwata chavo kuGaborone, Botswana.
Dr Tax vanove mudzimai wokutanga kuve munyori mukuru weSadc vakabva vatsigirawo Dr Nkosazana Dlamini-Zuma, sachigaro wechidzimai wekutanga kutungamirira African Union Commission. Dr Dlamini-Zuma vakange varipowo pamusangano weSadc ndokutura avo mashoko. Mapepanhau emudunhu neemhiri kwamakungwa akanyorawo zvakawanda pamusana pemusangano uyu, zvichiratidza kuti Sadc idunhu riri kuonekwa rakakosha.
Kana nhaurwa dze“Communique of 34th Ordinary Meeting of the Summit of the Heads of State and Government of the Southern African Development Community (Sadc)” inowanikwa pa“website” yeSadc kana yepepanhau reThe Herald inoti: <http://www.herald.co.zw>.
Svondo rinouya tinoongorora mashoko asachigaro vatsva pavakatambira chigaro uyewo pakavharwa musangano.
